Mas terkas ke nadie

Pertsona hitzaren esanahia maskara omen da. Guztiok daramagu gainean jarrita maskara bat edo beste. Guztioi erakusten digute txikitatik zelan jokatu behar dugun nortasun konkretu bat eraikitzeko. Ez da gauza bera mutila edo neska izatea. Estereotipoak barneratzen ditugu, eta horien arabera sortzen goaz gure izaera, eta horrek mugatu egiten gaitu tamalez.

Pasa den asteburuan izan ziren Valentzian Lesbianismoari buruzko topaketak, Politika Lesbikoak izenpean. Oso aberasgarria iruditu zitzaidan eztabaidatu zen guztia. Horri buruz bideo bat egiten ari naiz, eta aurrerago, hurrengo egunetan apika, gehiago sakontzea gustatuko litzaidake, zuek irakurri ahal izateko blogarian bertan ponentzia ezberdinen laburpenak.

Buruturiko ekintzen artean bat aukeratuko nuke: hamabost neska edo bildu ginen performance bat egiteko, gizonez mozorrotu ginen eta gizonen moduan jokatu genuen ordu batzuk. Emaitza harrigarria izan zen, denok ohartu ginen erabat baldintzatuta gaudela jaiotzatik, gizarteak derrigortzen gaituela genero murritzen espektakuloan parte hartzera; inposaturiko araua betetzen ez badugu agertokitik kanpo kokatzen gaituzte, protagonismo guztia kentzen, gure aukera baztertzen, gure izaera epaitzen.

Gizon eta emakume kategoriak apurtu behar direlakoan nago nortasun libreago bat eraikitzeko, gorputzaz nahi dugun moduan gozatzeko, beste jendearekin aurreiritzietatik baino haratago harremantzeko.

Primeran pasatu genuen, emozioz beteriko komunikazioa izan genuen. Benetan iraultzailea, dibertigarria eta sakona saioa.

Maskararen atzean hamaika aurpegi daude.

Nor naiz?

Meneame | del.icio.us